Plantun de Prouvènço

Pèr coumpara dos planto d'encò nostre

Lemna trisulca & Euonymus europaeus

Lentiho-d'aigo(-en-crous)

Lemna trisulca

Araceae Lemnaceae

Àutri noum : Lentihoun, Nadoun, Pampaieto, Tirounado.

Nom en français : Lenticule à trois lobes.

Descripcioun :
Aquesto lentiho-d'aigo que se vèi soulamen dins li canau de la valado dóu Rose e di plano de coustiero, trachis en coulounìo gaire sarrado e souvènt entre dos aigo. Pòu pas engana emé si "fueio" en crous que i'a rèn que ié sèmblo. Li foundo peréu soun bijarro qu'an coume de pecou que tenon sus rèn.

Usanço :
Li lentiho-d'aigo se manjon à la sartan coume un liume. En Poulougno, fin qu'à la debuto dóu siècle XXen, èron boulido e pièi cuecho emé de burre o de crèmo emé d'iòu.

Port : Erbo
Taio : 6 à 12 mm
Fueio : basalo
Tipe bioulougico : Idroufite
Cicle bioulougico : Planto renadivo

Gènre : Lemna
Famiho : Araceae
Famiho classico : Lemnaceae

Ordre : Alismatales

Coulour de la flour : Verdo
Petalo : ges
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : 0 à 800 m
Aparado : Noun
Jun à setèmbre

Liò : Aigo - Ribiero
Estànci : Mesoumediterran
Couroulougi : Subrecousmoupoulito
Ref. sc. : Lemna trisulca L., 1753

Bounet-de-capelan

Euonymus europaeus

Celastraceae

Àutri noum : Fusan, Coulougnet, Grano-pesoulino.

Noms en français : Fusain, Fusain d'Europe.

Descripcioun :
Lou bounet-de-capelan es un aubret que trachis dins li relarg fres e proche d'aigo. Fai de fueio longo de 2 à 10 cm e de pichòti flour en crous de 6 à 10 mm. Mai se recounèis subretout emé si fru que sèmblon li bounet que pourtien, à passa tèms, li capelan. Aquéli soun roso e quàsi redoun sus lou dessubre e caupon 4 grano. Coumpara emé lou bounet-de-capelan-di-làrgi-fueio qu'èi pentamèro.

Usanço :
Couneissèn pas d'usanço particuliero en Prouvènço pèr aquelo planto. Pamens se saup qu'es emé soun bos cabounisa que se fai lou fusan pèr lou dessin. Dins d'ùni relarg se servien di fru pèr tencha en rouge.